Flautað til sumars...

Allt búið - í bili!

Thu, 23 Aug 2007 20:22:44 GMT

Þá er tónleikavertíð dúósins lokið þetta sumarið með tónleikum í Sigurjónssafni þann 21. ágúst sl. Tónleikarnir voru skemmtilegur endir á viðburðaríku sumri og er dúóið nú komið í langþráð sjálfskipað 5 daga sumarfrí! Eru meðlimir dúósins því afar uppteknir við lestur, sjónvarpsgláp og sundferðir þessa dagana.

Af öðrum nýafstöðnum viðburðum er helst að nefna sögulegt "gigg" dúósins í ónefndu apóteki í borginni, auk spileríis á Menningarnótt; bæði í Hinu húsinu og á vel sóttum kvöldtónleikum í Dómkirkjunni. Getum við ekki annað en verið mjög ánægð með mætingu og stuðning vina, vandamanna og síðast en síst almennings við tónleikahald okkar í sumar. Við höfum alls staðar fengið góðar viðtökur og fína mætingu. Eins hóps hef ég þó saknað nokkuð eða viljað sjá meira af í salnum og er ég þar að tala um tónlistarfólk. Ég reyni sjálf að fylgjast vel með og vera dugleg að sækja þá tónleika sem bjóðast, bæði af áhuga og til að veita tónlistarfólkinu stuðning. Skora ég hér með á tónlistarfólk að vera duglegt að styðja við kollega sína, við erum jú hvers annars bakhjarlar!

Segi ég þetta gott í bili og óska lesendum góðra stunda.

Takk fyrir sumarið,

kveðja f.h. dúósins,

Hafdís

Lífið heldur áfram...

Tue, 07 Aug 2007 11:45:46 GMT

Á milli níutíu og hundrað manns komu á styrktartónleikana okkar í Dómkirkjunni síðastliðinn miðvikudag, 1. ágúst. Alls söfnuðust kr. 139.500 sem rennur óskipt í minningarsjóð um Susie Rut Einarsdóttur. Tónleikarnir tókust vel og var gaman að geta lagt sitt litla lóð á vogarskálarnar í báráttunni gegn fíkniefnum á Íslandi. Fjölskylda og vinir Susiear mættu vel á tónleikana og þökkum við þeim kærlega fyrir komuna og hlýjar viðtökur.

Næstu tónleikar dúósins verða í Stykkishólmskirkju næstkomandi fimmtudag, 9. ágúst, kl. 20:30 og eru að sjálfsögðu allir velkomnir. Aðgangseyrir er kr. 1000 fyrir um klukkustundarlangri skemmtuninni! Stykkishólmur er mjög fallegur bær heim að sækja og mælum við sérstaklega með því að fá sér í goggin á Narfeyrarstofu, fá sér göngutúr um höfnina og skunda síðan á sumartónleika í kirkjunni. Á efnisskránni eru m.a. verk eftir Gaubert, Messiaen, Sancan og Chopin.

Sjáumst vonandi,

Hafdís&Kristján Karl

Styrktartónleikar

Fri, 27 Jul 2007 13:06:42 GMT

Nú er komið að lokatónleikunum okkar sem skapandi sumarhópur á vegum Hins hússins. Verða það styrktartónleikar og mun ágóðinn renna óskiptur í nýstofnaðann minningarsjóð um Susie Rut Einarsdóttur sem lést þann 18. júní síðastliðinn 22 ára að aldri. Vinir hennar standa að stofnun sjóðsins og vinna þeir nú hörðum höndum að undirbúningi. Stjórn sjóðsins, stofnskrá hans og þau verkefni sem sjóðurinn hyggst beita sér fyrir verða kynnt í ágústmánuði. Mun sjóðurinn einkum beita sér fyrir því að styðja við verkefni sem annars vegar stuðla að forvörnum gegn notkun fíkniefna meðal ungs fólks í áhættuhópum og hins vegar verkefni til stuðnings þeim sem hafa lent á braut fíkniefna og vilja vinna sig út úr þeim.

Tónleikarnir verða í Dómkirkjunni miðvikudaginn 1. ágúst næstkomandi kl. 20:00 og standa í um klukkustund. Aðgangseyrir er kr. 1500 sem rennur sem fyrr segir óskiptur í minningarsjóðinn.

Við hvetjum fólk til að fjölmenna á tónleikana og sýna þannig stuðning sinn við þetta brýna málefni.

Kærar kveðjur,

Hafdís og Kristján Karl

Enn af spileríi...

Wed, 18 Jul 2007 22:48:35 GMT

Það er verða langt síðan það kom eitthvað hér inn síðast og skrifast það einkum á miklar annir og þó nokkra þreytu í herbúðum dúósins enda mikið drifið á daga dúósins síðastliðnar vikur. Þann 3. júlí síðastliðinn var seinasta heimsókn dúósins í flokknum dvalarheimili aldraðra/sjúkrahús en þær voru alls sjö. Tókust allar heimsóknirnar vel og var okkur jafnan afar vel tekið. Tónleikarnir í Gljúfrasteini þann 8. júlí voru mjög skemmtilegir og ágætlega sóttir og mikill heiður fyrir dúóið að fá að spila í stofu skáldsins. Föstudaginn 13. júlí, þann happadag, kom dúóið síðan fram á Kjarvalstöðum og í verslun Sævars Karls á þriðja og síðasta Föstudagsfiðrildi Hins hússins. Tókust þeir atburðir einnig með miklum ágætum. Í þessari viku höfum við heimsótt fjóra af leikskólum borgarinnar, en auk þess spiluðum við fyrir 5-8 ára börn í sumarskóla Ísakskóla í síðustu viku. Þemað var fuglar og spiluðum við í bland úr klassískum verkum, s.s. Svarta skógarþrestinum eftir Messiaen og Svaninn eftir Saint-Saëns, og sönglög sem börnin þekktu eins og Sá ég spóa og Krummi svaf í klettagjá. Síðan spiluðum við fuglahljóð og sýndum myndir. Krakkarnir voru upp til hópa áhugasamir og duglegir að hlusta og kom margt skemmtilegt fram í þessum heimsóknum!

Aðeins af "stofuspili" dúósins. Við buðum upp á þá nýjung að bjóða Reykvíkingum ókeypis tónleika heim í stofu. Þetta hefur mælst vel fyrir og hlotið þó nokkra kynningu og viðbrögð. Skemmst er þó frá því að segja að við höfum enn sem komið er aðeins heimsótt eitt reykvískt heimili, en tókst sá viðburður að okkar mati með eindæmum vel og er að okkar mati eitt af því sem stendur hvað hæst upp úr hvað af er sumri. Okkur var einstaklega vel tekið og var bæði hlýlegt, skemmtilegt og gefandi að geta fært fólki tónlistina heim í stofu. Ekki er öll von úti enn fyrir þá sem vilja skoða þennan möguleika og hvetjum við fólk til að hafa samband og kanna málið (s. 696-5298). Tilefnið má sem fyrr segir vera stórt eða lítið, allt eða ekkert, en skilyrðið er að þetta sé í heimahúsi.

Framundan hjá dúóinu er Vængjasláttur Hins hússins eða uppskeruhátíð skapandi sumarhópa sem fram fer í Tjarnarsal Ráðhússins kl. 20 annað kvöld (fimmtudag). Má þar búast við þó nokkru húllumhæi. Strax í bítið á föstudaginn verður svo flogið norður í land þar sem dúóið heldur hádegistónleika í Ketilhúsinu á Akureyri kl. 12:00 sem hluti af dagskrá Listasumars. Hvetjum við Norðlendinga til að fjölmenna á tónleikana og hafa með sér þúsund kall fyrir ca. 45 mínútna langri skemmtuninni. Verkin sem við komum til með að flytja á tónleikunum eru fjölbreytt og aðgengileg. Þemað er sem fyrr franskt en tónskáldin sem verða í smásjánni eru Leclair, Chopin, Messiaen, Gaubert og Sancan.

En við förum að segja þetta gott í bili en minnum jafnframt á loka-styrktartónleika dúósins hjá Hinu húsinu sem verða haldnir helgina 28./29. júlí og verða auglýstir hér í næstu viku. Við hvetjum fólk til að fylgjast vel með því og mæta og styrkja gott málefni.

Bless í bili,

Para-Dís

Annasöm vika

Fri, 29 Jun 2007 18:24:52 GMT

Annarri vinnuviku dúósins para-Dís hjá Hinu húsinu að ljúka og ekki var hún viðburðaminni en sú fyrsta. Dúóið kom fjórum sinnum fram á dvalarheimilum og sjúkrahúsum í vikunni og hélt í dag tónleika í bókasal Þjóðmenningarhússins í fallegum salarkynnum. Þangað var vel mætt og þökkum við öllum þeim sem sáu sér fært að gera sér þangað ferð í blíðunni og hlusta á vel valda franska tóna. Núna í eftirmiðdaginn kom dúóið síðan fram í beinni útsendingu í Hlaupanótunni á Rás 1 í spil og spjall. Hægt er að heyra upptöku af þættinum á www.ruv.is. Við fengum góða kynningu á verkefni okkar hjá Hinu húsinu bæði í Blaðinu og Morgunblaðinu á miðvikudaginn var. Þar var sérstaklega kynnt sú nýjung sem dúóið býður upp á, en hún er sú að við bjóðumst til að koma í stofur Reykvíkinga í júní og júlí og spila stutta efnisskrá endurgjaldslaust. Með þessu viljum við auka og efla kynningu klassískrar tónlistar og koma með tónlistina til fólksins og á staði sem hún myndi annars ekki rata á. Skilyrði fyrir slíkri beiðni er að viðkomandi sé búsettur í Reykjavík og að þetta sé í heimahúsi. Tilefnið má vera hvað sem er, matarboð, afmælsveisla eða bara ekkert sérstakt tilefni. Við hvetjum áhugasama til að hafa samband og kynna sér málið enn frekar. Efnisskrá okkar í sumar er sem fyrr hefur komið fram frönsk tónlist og leggjum við áherslu á fjölbreytni og léttleika. En nú styttist í fyrsta heimagiggið okkar sem er núna í kvöld í matarboði hjá fjölskyldu nokkurri í Reykjavík. Í næstu viku hægist aðeins um hjá dúóinu sem fer í undirbúa næstu tónleika sem verða sunnudaginn 8. júlí kl. 16:00 í Gljúfrasteini, húsi Halldórs Laxness. Þar eru stofutónleikar alla sunnudaga í sumar með ólíku tónlistarfólki. Fræðast má betur um dagskrána í sumar á www.gljufrasteinn.is. En við segjum þetta gott í bili og hvetjum alla til að njóta veðurblíðunnar. Hafdís og Kristján Karl

Tónaregn í Reykjavík

Wed, 27 Jun 2007 01:11:08 GMT

Vinna para-Dís á vegum Hins hússins er nú í fullum gangi og standa þessa dagana yfir heimsóknir á dvalarheimili aldraðra og sjúkrahús borgarinnar. Spilamennskan hefur gengið vel og höfum við fengið góðar viðtökur á þeim stöðum sem við höfum heimsótt. Á föstudaginn kemur flögrar síðan annað föstudagsfiðrildi Hins hússins um miðbæinn milli kl. 12 og 14. Við það tækifæri ætlum við að halda tónleika í Þjóðmenningarhúsinu v/Hverfisgötu kl. 12:15. Þangað eru auðvitað allir velkomnir að njóta léttra franskra tóna í fallegu umhverfi. Tónleikarnir verða um 30 – 40 mínútur að lengd og er aðgangur ókeypis. Eftir tónleikana er tilvalið að rölta um bæinn og athuga hvort fyrir verði ekki annar skapandi sumarhópur Hins hússins með spennandi dagskrá. Hvetjum við Reykvíkinga og nærsveitunga til að nýta sér þá fjölbreyttu viðburði sem í boði verða sér til ánægju og upplyftingar!

Sumarkveðjur,

Hafdís og Kristján Karl

Eftirmiðdagstónleikar í Dómkirkjunni

Wed, 20 Jun 2007 20:03:14 GMT

Fimmtudaginn 21. júní kl. 17:00 heldur para-Dís rólega eftirmiðdagstónleika í Dómkirkjunni. Tónleikarnir eru um hálftími að lengd og er tilvalið að slaka á eftir vinnudaginn og hlusta á ljúfa franska tóna og fá sér svo kaffibolla í miðborginni eftir á. Aðgangur er ókeypis sem og á alla viðburði okkar á vegum Hins hússins (fyrir utan styrktartónleikana).

Efnisskrá tónleikanna er eftirfarandi:

Jean Marie-Leclair (1697-1764):

Sónata nr. 8:

Andante

Allegro ma non troppo

Gabriel Fauré:

Morceau de Concours

Maurice Ravel (umritun f. flautu og píanó e. Louis Fleury) :

Pièce en forme de habanera

Philippe Gaubert:

Madrigal

Charles Marie Widor:

Svíta op. 34:

Scherzo

Romance

Við vonumst til að sjá þig!

Hafdís og Kristján Karl

para-Dís

Sun, 17 Jun 2007 22:52:43 GMT

Góðan dag og gleðilega þjóðhátíð!

Dúóið para-Dís er komið til landsins og sumarvertíðin hafin. Dúóið er skipað tveimur ungum hljóðfæraleikurum, þeim Hafdísi Vigfúsdóttur flautuleikara og Kristjáni Karli Bragasyni píanóleikara. Við stundum bæði framhaldsnám í tónlist í París.

Leikar hófust í Ráðhúsi Reykjavíkur í dag þar sem við spiluðum létt frönsk sumarlög fyrir landann. Þetta var okkar fyrsta verkefni í sumar sem skapandi sumarhópur á vegum Hins hússins. Undanfarnar vikur hafa farið í skipulagningu verkefnis okkar sem við nefnum "Tónaregn í Reykjavík". Verkefnið er fimmþætt og hefur að að markmiði að ná til breiðs hóps hlustenda. Við komum til með að spila á dvalarheimilum aldraðra og sjúkrahúsum; leikskólum, halda opinbera tónleika í kirkjum og listasöfnum; spila í heimahúsum (nánari uppl. í síma 696-5298 og 864-0010) sem og að halda styrktartónleika. Ókeypis aðgangur er á alla viðburði okkar á vegum Hins hússins í sumar, fyrir utan styrktartónleikana þar sem féð sem safnast rennur ósnert til styrktarsamtakanna (nánar auglýst síðar). En para-Dís verður á fleiri stöðum en Hinu húsinu í sumar og mun einnig halda tónleika í stofutónleikaröð Gljúfrasteins - húsi Halldórs Laxness, Listasumri á Akureyri, sumartónleikaröð Stykkishólmskirkju og Listasafns Sigurjóns. Við hvetjum ykkur til að fylgjast með okkur hérna á síðunni í sumar og kíkja á tónleika. Þema sumarsins er frönsk tónlist og við lofum léttum og sumarlegum tónleikum víðs vegar um landið í sumar.

Dagskráin í sumar er á þessa leið:

21. júní kl. 17 í Dómkirkjunni (HH)

29. júní kl. 12:15 í Þjóðmenningarhúsinu (HH)

8. júlí kl. 16 í Gljúfrasteini (stofutónleikaröð Gljúfrasteins)

13. júlí kl. 12:15 á Kjarvalsstöðum (HH)

19. júlí kl. 20 í Tjarnarsal Ráðhússins (HH)

20. júlí kl. 12 í Ketilhúsinu á Akureyri (Listasumar á Akureyri)

28. júlí Loka-styrktartónleikar verkefnisins “Tónaregn í Reykjavík” (HH)

9. ágúst kl. 20:30 í Stykkishólmskirkju (sumartónleikaröð Stykkishólmskirkju)

18. ágúst Menningarnótt (HH)

21. ágúst kl. 20:30 í Sigurjónssafni (sumartónleikaröð Listasafns Sigurjóns Ólafssonar)